احترف الفوتوشوب+شرح مفصل بالصور+الأجزاء الكاملة +قريبا شرح با الفديو انتظرو......

احترف الفوتوشوب ... شرح مفصل بالصور ... الأجزاء الكاملة

احترف الفوتوشوب ... شرح مفصل بالصور ... الأجزاء الكاملة

بالبدايه احب انوه ان الفوتوشوب الي بنشرحه هو الاصدار السادس باللغه الانجليزيه طبعا ..
لانه افضل وشامل حتى بالشروحات الي موجوده بمواقع ثانيه ..

هذي واجهة الفوتوشوب ...





رقم (1) -

هي القائمة الاساسيه والاولى الي تتحكم فيها بالتصميم كامل ...

رقم (2) -

فيها الإستايلات الجاهزه يعني بهذي الاستايلات ممكن تستعمل تصميم كامل وجاهز بضغطة زر واحده ..

رقم (3) -

هي مكان الليرات او الشفافيات ..

والليرة هي بالانجليزيه اما بالعربي شفافيه .. يعني بالمفهوم العام صفحه او طبقه مع التعامل معها بتفهون وش هي بالتحديد ...

رقم (4) -

من هذي النافذه .. تقدر تشوف تصميمك كامل بشكل مصغر .. ومنها تتحكم بحجم التصميم سواء تصغره او تكبره ..

(5) - هذا الاكشن والهستوري .. الاكشن .. هو عباره عن تصميم واحدن من المصممين سواه وحطه لك جاهز .. انت تروح للاكشن وتضغط على السهم الصغير الي جنبه وتختار (lode) وبينزل بالفوتوشوب التصميم الي سواه نفس المصمم الي اول .. وبكذا بضغطت زر واحده والي هي السهم مثل حق الفديو تضغط عليه .. يقوم يفتح لك صفحه جديده ويسوي لك تصميم كامل .. بصراحه انا ماحبيته ولاتعاملت معه لانه ادوخني والظاهر باين من شرحي

-----------------------------------------------------------------------------

هذا هو الشرح العمومي لواجهة الفوتو ..

انت الآن فتحت البرنامج وتبي تسوي اي تصميم ...

تتبع الطريقه التاليه ..





تروح لــFile ومنها لــNew

وبعد ماتختار نيو ..
بتطلع لك هذي ..






شايفين كلمة ( pixels ) هذي يعني المساحه المستخدمه بالبيكسل .. وتقدر تغيرها للسنتي والانش ..
بس المستخدم عموماً هو البيسكل .. عاد تختار مثلاً 500 * 500 مكان الاسهم الزرقا ..


اذا سويت هذا كله .. انت الآن فكيت صفحه جديده تماما .. وباقي بس تبدع فيها يامبدع ..
عاد فيه خطوه لازم تتعود عليها عشان بالمستقبل ماتصير لك مشاكل مع الفلاتر والعلوم السنعه ..

وهي انك تروح للــليره .. وتسوي فيها كذا ..



تضغط عليها بالزر الايمن للفاره همن تختار Duplicate Layer يعني دوبلكت يعني دبل الليره ..
واستعمل الليره الي ماعليها قفل .. لان الي مقفله بلشه ولاتقدر تتحكم فيها تحكم كامل ..


الآن ... عرفتو القوائم الاساسيه بالفوتوشوب ..
بشكل مبسط وسهل وبدون تعقيد ولافلسفه ..
نبدا إن شاء الله بشرح بعض القوائم الاساسيه بالبرنامج ..




الجزء الثاني


تذكرون بصورة الواجهه الرئيسية رقم (1) ؟؟
الي فيها صورة دويره وسهم وفرشه وشخاميط واشياء كثيره ...
انا الحين بشرحها لكم بالتفصيل ..
طبعا الاساسيات بشرح ...
بسم الله الرحمن الرحيم





هذا السهم ياطويلين العمر هو للتحكم بالصورة ..
يعني تشيلها من اليمين لليسار او العكس او من فوق لتحت وهكذا ..
عاد اذا اخترتو هالسهم يعني ضغطتو عليه ..
بيجيكم فوق مثل هالشكل





شايفين المربع الي جنب كلمة Shwo Bounding Box
لو تحطون صح على هالمربع الي جنب هالجمله ..
بعدها تقدرون تتحكمون تحكم كـــــــــــــامل بالصورة من ناحية :-
1 - طول الصورة
2 - عرض الصورة
3 - تصغير الصورة
4 - تكبير الصورة
5 - قلب الصورة _ يعني تقلبها راس على عقب ..
6 - تميلها مثلا 45 درجه ..
اما الصور الثانيه هذي ممكن تكون مربع او دائرة او خط يعني لاتعتمدون على صوري ..
المهم بهذي تقدر تسوي اشكال حلوه ..
يعني لو مثلا اخذت المربع .. وسويت مربع صغير وجنبه واحد كبير .. تقدر تلون كل واحد بلون .
بس هاااه انتبه لشي .. اول شي مثلا تسوي كبير .. وتلونه بالسطل .. بعدين (انتبه لهذي النقطه) تضغط على Ctrl + D عشان يشيل الحدود تبع المربع ...
بعد كذا سوي مربع صغير ولونه .. لانك لو ماشلت الحدود بتلون المربعين مع بعضهم ..
وطبعا ماراح تفهم ولاشي من الي قلته لين تجرب بنفسك ..
لان الي علي اني اوصل اساس المعلومه والتفصيل عليك انــــــــــــــــــــــــــــــــت


اما الفرشاة السحريه هذي تقدر تسوي حركات نص كم ..
اقولك كيف ... مثلا انت اخترت صورة وفيه دائرتين جنب بعض .. فرضاً يعني لاتقعد تقول وش هالمثال المهم .. وتبي تاخذ الدايره الي على اليمين بس .. تقوم تاخذ هالعصا السحريه .. وتضغط على الدايره الي تبيها .. وبكذا بيصير فيه تحديد كامل حول الدايره ..
بعدها تضغط على الدايره بالزر الايمن للفاره .... وتختار كوبي طبعا بالعنقليزي يعني Layer via Copy
وبكذا بينسخ لك الدائره الي انت اخترتها لحال في طبقه جديده كامله ....
لاتناظرني وانا اخوك .. رح جرب وارجع كمل عشان تستوعب الي قلته
واستعمل هالصورة للتجربه ...







اما هالزر شغلته شغله ...
يعني بهذا الزر تقدر تستخدمه بثلاث اشكال .. شرط اضغط عليه بالزر الايمن للفاره همن بتشوف الثلاثه ..
بعطيك انا معلومه اساسيه من وظيفته .. وهو يقص الصورة بالشكل الي تبيه انت ..
فيه الاول .. يقص بشكل عشوائي .. والثاني يقص على شكل مربعات يعني مايقبل اي منحنى .. (كني اذكركم بالرياضياتs" )
المهم .. والثالث الي فيه المغناطيس صراحه شغلته عجيبه ..
يعني شفت صورة الدايرتين الي اول عطيتك هي؟
خذها مرتن ثانيه وفاتحها بالفوتوشوب ..
واختار ابو مغناطيس هذا .. ولفه حول الدايره وشوف وش يسوي؟
بيلصق باطراف الدايره هو بنفسه يلصق .. ولايسوي اي بعثره صراحه مفيد ..

اما هالزر فهو صراحه من اعز اصدقائي .. يعني مايعرف يمزح ابد لذلك خاويه ازين ..
ذا طال عمرك لاجيت واستعملته .. ومثلا حددت مساحه معينه فيه ..
اضغط على نفس المساحه الفاتحه مرتين راح يقص كل الاطراف الي حولينها ..
يعني بالعربي الفصيح (سيقص جميع الاطراف التي لاتحتاج اليها) .. زين .. جرب الله يسلمك همن كمل ..
وزر الفرشه عاد معروف مثل الرسام الله يحفظه ...
يعني معروفه شغلته ...

والزر الي جنبه الي كنه طالع منه خيط ذا
البخاخ تبع الفوتو .. يعني برضو اخوان مع الرسام ..

اما هذي الفرشه فانا بصراحه ماعمري استعملتها ولاقد شفتها باي شرح .. ولاودي اتفلسف

والي جنبها الي كنها محبره اذا كان الاسم صحيح نفس الشي بعد ماتعاملت معها ،،،
اما هالزر فهو الاستايلات .. واذا ضغطت عليه بالزر الايمن للفاره .. بيطلع لك السطل انتبه لهذي المعلومه ..
وهذي مثال للإستايلات ..





وهذي الممحاة

وهذا الزر انا اسميه المزيف .. لانه من خلاله تقدر تلعب مثلاً ببطاقه شخصيه وتغير كل محتوياتها (ترا مااحرضكم على شي ) .. الفرشه او الاسفنجه السوده .. هذي تفــتــّــح .. المناطق الي تمسح فيها .. واليدر العكس .. تغمق المناطق الي تمسح فيها .. اما الاسفنجه البيضه .. فهي تخرب السالفه وتسود المناطق الي تمسح فيها ..
روح جرب الله يزوجك ان شاء الله روح .. وارجع كمل عشان تستوعب وتحفظ الي اقوله زين ..
اما هالزر الي كنه قطرة ماء .. اقولكم وش يسوي .. الحين لاكبيت مويه على دفتر .. شفت الحبر الي مكتوب فيه كيف يتناثر بالدفتر ويصير شكله مدري وشلون؟ هذي تسوي نفس الشي ... جربها وتعرف وش اقصد ...
وهذا الزر هو للكتابه طبعاً .. بس انتبه لشغله .. شوف الصورة واشرح لك ..

تم تصغير الصورة تلقائياً. مقاسات الصورة الأصلية 692x32 وحجمها 27KB.

(1) - تختار الكتابه مفرغه من الداخل او معبئه .
(2) - تختار الكتابة من اليمين او اليسار ... او من فوق لتحت ..
(3) - تختار نوع الخط ..
(4) - اتركها .
(5) - حجم الخط .
(6) - تبي الكتابه متوسطه .. او تكون باليمين .. او تكون باليسار ..
(7) - تبي الكتابه تبدا من اليمين .. او تبدا من اليسار ..
(8) - لـــون الخط ..





وهالزر طال عمركم مسميه رموز جاهزه واذا اخترته تطلع لك هذي القائمه ..








بمعنى انك تقدر تسوي دائرة او مربع او مستطيل او اي شكل تبيه من هذا الزر ..
وصورة القلم الي جنبه .. هذا يقاله الباث .. مزعح بصراحه ولاحبيت اتعامل معاه ..
بس بصراحه ولاانكر تراه مفيد .. ولكني قلت انا الي ماحبيت اتعامل معاه ..
لذلك مااقدر اشرحه لكم مع ان استخدامه نادر .. وهو بس يسوي خطوط مايله بس بطريقه معقده ..
وهذي صورة القطارة من خلالها .. تقدر تاخذ اي لون موجود باي صورة او تصميم .. بس ضغطه وحده وبيجيك اللون بالمربع الي على اليسار الخاص بالالوان .. جرب عشان تعرفها .........................
وهذي المفكره يعني تقدر باي مكان بالتصميم تختارها وبيطلع لك مربع تكتب فيه ملاحظه معينه يصير لابغيت تسوي اي تغير ونسيته تراجعها وتتذكر الي تبيه ..
اما صورة اليد .. برضو مااتعامل معها ..
وهذا طبعا المجهر تقدر تكبر التصميم او تصغره على مزاجك ..
ان شاء الله استفدتو ..




المرحلة الثالثة :


.. نكمل الشرح ...

بعطيكم بعض المعلومات الاساسيه والي لازم تعرفها عشان تكون فعلاً محترف ..

شوفو انا عندي ثلاث طبقات الآن ..
الاساسيه ووحده مخليها خلفيه ووحده فيها كتابه ..

تم تصغير الصورة تلقائياً. مقاسات الصورة الأصلية 565x160 وحجمها 94KB.

وانا مثلا متضايق لان الطبقات كثيرة ولابعدل فيها شي ..
كيف اضمهم مع بعض؟؟
بحيث اوفر مساحة بنافذة الليرات وبحجم الصورة لو حفظتها ..
اقولكم كيف ..
اول شي شوف المربع الي جنب العين ..
طبعا العين هذي اذا شلتها تختفي طبقة الليرة في نافذة التصميم ..
واذا كانت موجوده العين بتظهر الطبقه .. جرب عشان تفهم الي قلته

تم تصغير الصورة تلقائياً. مقاسات الصورة الأصلية 565x160 وحجمها 89KB.

شايفين الي حوله دائرة حمرا ..
هذا لما ضغطت عليه طلعت فيه حلقه حديديه ..

اقوم اضغط كمان بالمربع الي بطبقة الخلفيه البيضاء بالي ماشر عليه بالسهم ..

بحيث تصير كذا

تم تصغير الصورة تلقائياً. مقاسات الصورة الأصلية 565x160 وحجمها 86KB.

بعد ماصارت احد الليرات ماشر عليها ..
والباقيات فيها الحلقه الحديديه ..

الآن اضغط Ctrl + E

وشوف النتيجه

تم تصغير الصورة تلقائياً. مقاسات الصورة الأصلية 565x160 وحجمها 77KB.

شايف كيف التمو كلهم سوا؟؟؟
بحيث حتى لو كنت تسوي تصميم مثلاً من 10 طبقات وصايرة لك زحمه ..
تقدر بهذي الطريقه تضم خمس طبقات انتهيت منهن ويخف عليك البرنامج

حركه حلوه وخفيفه ومهمه بنفس الوقت ...

---------------------------------------------------------

وهذي بعد حركه حلوه تقدر فيها تتحكم بالصورفقط .. او التصاميم ..

تابعو معي ...

عندي مثلاً صورة هذا الجوال ..









شوفو كيف ممكن اغيره جذريا ..








او







طريقة سهله جداً .. ومهمه بعد ...
اقولكم كيف ...








تابع الصورة ..
يعني اختار Image بعدين Adjust بعدين Hue/Saturation

بعدين بيظهر لك هذا المربع ....








شايف السهم الي ماشر على مربع ضروري تحط عليه علامة صح .. عشان يتوضح لك انت وش تسوي ...

وبكذا تقدر تغير لون اي صورة عندك وتتحكم فيها تحكم كامل

ان شاء الله فادتكم هالاساسيات ..
بكذا انت لو عرفت كل هذا الي انا شرحته بتصير محترف بالفوتوشوب ..

الباقي عليكم ياغالين ..
انتم الي تكتشفون طرق التصميم وخفاياها ..
وللمعلوميه .. كل الي شرحته لكم تعلمته من نفسي وبالممارسه ..
حيث اني اجلس على هذا البرنامج يوميا مايقارب ساعتين ..
لاني هويته بصراحه ...

ولم ينتهي الطريق هنا ..
بشرح لكم عدة دروس بإذن الله تقدر من خلالها تضيف لمخيلتك مجال اوسع من الموجود ..
وبكذا افيدكم اكثر بإذن الله ..
بعطيكم فقط بعض الخدع البسيطه الي تستخدمها عن طريق برنامج الفوتوشوب ..

لاتحتاج الا فلاتر او اكشنات او اي شي من ادوات الفوتوشوب الاحترافيه